O presidente da Deputación da Coruña e o alcalde de Ferrol visitaron hoxe a comunidade terapéutica O Confurco-ASFEDRO. Acompañados da presidenta e o secretario da entidade, Rosario Alabau e Francisco Varela, coñeceron as instalación e os diferentes programas e servizos que ofrecen para tratar e rehabilitar ás persoas con problemas de drogodependencias e que contan co apoio económico da Deputación a través das liñas de subvencións de Servizos Sociais.
Os responsables da entidade destacaron a longa traxectoria de colaboración entre a Deputación e ASFEDRO, que permitiu ao longo dos anos adquirir a práctica totalidade do equipamento actual do centro (cociñas, mobles, etc.) e adecuar o inmoble ás necesidades dos usuarios e usuarias. Así mesmo trasladaron a necesidade de substituír o tellado, que despois de case tres décadas precisa de continuas reparacións para evitar filtracións de auga e humidades, e dotar ao centro de saneamento.
González Formoso anunciou que a Deputación destinará 60.000 euros para executar esta importante obra de substitución da cuberta, atendendo así a petición do alcalde de Ferrol e da propia entidade. «Vimos de ver que é unha obra urxente e necesaria para permitir que a gran labor social que desenvolve este centro en toda a comarca siga efectuándose» afirmou o presidente, que comprometeu o apoio económico da Deputación para efectuar as obras o vindeiro ano. A Deputación estudará tamén a súa colaboración para as obras de dotación de saneamento e para introducir melloras de eficiencia enerxética a través da Axencia Enerxética Provincial que, «suporán unha importante mellora estrutural do edificio e da calidade de vida dos usuarios», afirmou.
Os responsables de ASFEDRO explicaron que a entidade fundouse por iniciativa social no ano 1985 co obxectivo de dar unha resposta integral e profesional aos problemas de drogodependencias, impulsar a integración social destas persoas e sensibilizar á sociedade sobre a importancia da prevención.
Ademais da comunidade terapéutica do Confurco, situada na parroquia de Doniños, onde se realizan tratamentos de deshabituación e rehabilitación en réxime residencial que inclúen atención médica e psicoterapéutica, ASFEDRO conta tamén cun Centro de Día, onde se desenvolven actividades encamiñadas a favorecer a integración social e laboral das persoas en colaboración con entidades externas coma o Centro de Formación Ocupacional e Profesional de Ferrol, escolas-obradoiro ou empresas locais.
Cursos de informática, xardinería ou repostería, actividades deportivas, obradoiros de estudo e formación, programas de prevención de recaídas…son algunhas das actividades que mantén ASFEDRO ao longo do ano.
