Aínda que o seu primeiro libro chegou ás librarías o 20 de marzo, Paula Vilaboy di que aínda non baixou da nube. A emoción segue intacta, como se o feito de ver Eres naturaleza. Guía para vivir despacio y reconectar con lo esencial nos escaparates fose algo irreal. «Foi un ano enteiro escribíndoo», conta, «e velo agora en directo paréceme un soño».
Paula é bióloga de formación, pero foi nas redes sociais onde comezou a construír o seu universo: un espazo virtual onde fala de vida sostible, natureza, menstruación consciente, trucos ecolóxicos e o valor do descanso. Ese estilo directo, cotián e transparente que a levou a conectar con millóns de persoas en TikTok é o mesmo que agora traslada ao papel. «O libro está escrito coma se estivésemos ti e máis eu tomando algo nun bar», explica. A súa intención era clara: que a lectura fose tan fluída e próxima como un dos seus vídeos. E funcionou. Son moitas as lectoras que lle escriben dicíndolle que len o libro coa súa voz na cabeza.
O fío condutor de Eres naturaleza é unha reflexión sobre a gran desconexión que temos coa contorna natural. Para Paula, moitas das tensións e malestares que arrastramos hoxe en día están relacionadas con esa ruptura co ritmo da natureza, co noso corpo e co que nos rodea. Ao longo das súas páxinas, convida a parar, observar e cambiar pouco a pouco hábitos cotiáns. Desde aprender a facer nada (si, iso tamén ten nome) ata comprender mellor o ciclo menstrual ou fixarse en como se producen as cousas que consumimos, o libro funciona como unha guía que non impón, senón que acompaña.
A proposta, lonxe de seguir a lóxica do consumo rápido, aposta polo contrario: ir máis amodo, facer pequenos cambios sostibles que poidan manterse no tempo e, sempre que se poida, reservar un momento á semana para estar en contacto coa natureza. «Ir ao teu ritmo é o máis importante», subliña.
A idea de escribir un libro non foi algo premeditado. Chegou cunha mensaxe privada no seu Instagram. A súa editora propoñíalle embarcarse nun proxecto editorial e, tras unha semana dándolle voltas, decidiu lanzarse. A pesar do medo inicial á famosa páxina en branco, a clave foi deixarse levar e estruturar as ideas coma se fosen unha conversa.
A acollida non puido ser mellor. «O que máis ilusión me fai é que hai persoas que, despois de lelo, mercan outro exemplar para regalalo», di con entusiasmo. A súa comunidade está a recibir o libro con agarimo, e cada mensaxe que lle chega confírmao. «Se puidese, ensinábavos a miña bandexa de entrada para que leses o que me escribe a xente. É precioso».
De momento, Paula está centrada en presentar o libro por Galicia, asinando exemplares en librarías e feiras. Non descarta escribir outro máis adiante —de feito, xa tivo que deixar contidos fóra por pasarse do límite de palabras—, pero asegura que vai con calma, como predica. «Tempo ao tempo», di.
Para quen se pregunte onde atopalo, Eres naturaleza está dispoñible en practicamente calquera libraría, dende grandes cadeas ata tendas pequenas de barrio. E, se non está, sempre se pode encargar.
Paula Vilaboy non vende fórmulas máxicas nin promesas baleiras. O que ofrece é unha invitación a volver ao esencial, a vivir máis despacio e a facelo sen culpa. O seu libro é, como ela mesma di, «un lugar seguro para a reflexión e a introspección». Un refuxio de papel onde reconectar coa vida, co corpo, co tempo e co mundo.
