The Rapants publican este luns o seu novo tema ‘Non Sei Como’, o primeiro sinxelo do disco, ‘Rapants Club‘. A peza, na que colabora Joe Crepúsculo, xa está dispoñible nas plataformas dixitais.
Con esta tarxeta de presentación, o grupo pon de manifesto que ‘Rapants Club’ é máis que un disco: «é a nosa maneira de entender a vida, que é a través da música, e de agradecer ás nosas familias, fans e equipo todo o compartido nestes anos. Elas e eles son este club”, apunta a banda.
‘Non Sei Como’ mestura música disco, rock e electrónica, e conta coa colaboración de Joe Crepúsculo, que por primeira vez canta en galego.
Este luns saíu tamén o videoclip que acompaña o tema. Nel aparecen figuras como o futbolista Hugo Rama, os actores Miguel de Lira e Federico Pérez, as artistas Antía Ameixeiras e Sabela Caamaño -o dúo Caamaño&Ameixeiras-, os cantantes 9Louro e Xián Pais, os creadores de contido Champimuros e Merce Totakeki ou mesmo o campeón de surf Guillermo Carracedo.
