Vilagarcía de Arousa vén de acadar un fito histórico ao superar por primeira vez a barreira dos 38.000 habitantes. Segundo a última estimación do Instituto Nacional de Estatística (INE), a poboación empadroada ascende a 38.168 persoas a 1 de xaneiro de 2026. Aínda que se trata dun dato provisional, todo apunta a que a cifra definitiva confirmará este novo récord demográfico.
Unha tendencia de crecemento sostido
A evolución da poboación vilagarciá non é puntual, senón que responde a unha dinámica positiva que se mantén ao longo dos últimos anos. Tras o freo experimentado en 2021 debido á pandemia, o municipio recuperou o ritmo de crecemento.
En termos comparativos, Vilagarcía pasou de 37.456 habitantes en 2019 a 37.888 en 2025, o que supón un incremento notable. De confirmarse os datos actuais, o aumento no conxunto deste período elevaríase ata as 712 persoas, consolidando unha progresión continuada.
Vilagarcía, foco de atracción de poboación
Desde o goberno local destacan que estes datos reforzan o papel da cidade como un dos principais polos de atracción de poboación en Galicia. A vila mantense así entre as máis poboadas da comunidade, tan só por detrás das sete cidades e de Narón.
Os datos consolidan a Vilagarcía como a oitava cidade galega. Máis emprego e máis poboación. Somos unha cidade chea de vida, fermosa e cunha intensa actividade cultural. O lugar no que cada día máis persoas elixen para vivir! pic.twitter.com/WkmCaZHk16
— Alberto Varela (@albertovapaz) April 6, 2026
O alcalde, Alberto Varela, vincula esta evolución ao «bo momento económico e social» que atravesa o municipio. Segundo explica, Vilagarcía conta con «boas cifras de emprego, unha ampla rede de servizos e infraestruturas e un destacado dinamismo cultural«.
Un modelo de cidade máis humana e sostible
Outro dos factores clave, segundo o rexedor, é a aposta por «un modelo urbano centrado nas persoas», que inclúe a humanización de espazos públicos e a recuperación de zonas degradadas, actuacións que «contribúen a facer da cidade un lugar máis atractivo e cómodo para vivir«. A isto súmanse «os investimentos realizados nos últimos anos», tanto con recursos propios como mediante a captación de fondos europeos, que permitiron impulsar «diferentes proxectos de transformación urbana».
