Os feitos tiveron lugar o pasado 22 de marzo, cando activistas de Greenpeace localizaron e documentaron a actividade do buque Naboeiro durante unha expedición científica e de vixilancia na chamada Zona de Convergencia das correntes de Canarias e Guinea, fronte á costa occidental de África. Trátase dun espazo no que conflúen correntes mariñas frías e cálidas, xerando unha elevada produtividade biolóxica e favorecendo a presenza de numerosas especies ameazadas.
Segundo a información recollida pola organización, nesta zona existen montes submarinos que funcionan como áreas de cría, refuxio e paso para especies migratorias, entre elas varios tipos de tiburóns. Greenpeace advirte de que, a pesar da súa relevancia ambiental, estas augas internacionais carecen de protección efectiva fronte á pesca industrial.
A ONG sinala que durante a xornada de observación se documentaron capturas de tiburón zorro ojón, unha especie considerada vulnerable, e apunta a posibles incumprimentos da normativa europea, que obriga a liberar estes animais con rapidez e sen causarlles dano. Ademais, alerta sobre o uso do palangre de superficie, unha arte de pesca pouco selectiva que provoca capturas accidentais de especies protexidas.
Greenpeace lembra que menos do 1% da alta mar está actualmente protexida, malia representar case dous terzos da superficie oceánica do planeta. A organización reclamou ás autoridades españolas e ás institucións internacionais que investiguen os feitos, que reforcen os mecanismos de vixilancia e sanción e insiste na urxencia de crear unha rede de santuarios mariños en alta mar, en liña cos compromisos internacionais de protexer polo menos o 30% dos océanos antes de 2030.
