O 25 de novembro celebrouse o Día Internacional contra a Violencia de Xénero. Unha xornada na que os concellos demostraron o seu compromiso na loita contra esta lacra, que cada ano provoca a morte de ducias de mulleres a mans das súas parellas ou ex-parellas.
Os cinco consistorios puxeron en marcha distintas iniciativas para concienciar sobre esta problemática, como obradoiros e faladoiros que deron voz ás mulleres e visibilizaron a desigualdade existente. E non só o 25 de novembro, senón tamén durante os días previos e posteriores, simbolizando que esta non é unha loita só dun día, senón tamén dos outros 364 restantes.
Ademais, varios concellos da comarca do Eume sumáronse á campaña “En negro contra as violencias”, unha acción social colectiva que busca implicar ó tecido económico, asociativo, educativo, deportivo, social e cultural, e que cada ano “tingue” de negro as fachadas e escaparates dos establecementos e organismos colaboradores.
O obxectivo? Rememorar ás mulleres que perderon a vida, mostrar apoio ás vítimas que sofren ou sufriron esta lacra, e concienciar á sociedade da dimensión deste problema.
As Pontes: A estrea da curtometraxe “Nunca máis”, gañadora do Concurso de Guións contra a Violencia de Xénero da Deputación, foi o acto máis sinalado.
Cabanas: O pintado do “banco contra as violencias machistas” e a organización dunha gran batucada feminista na rúa centraron as actividades polo día 25 de novembro.
Monfero: Unha “Andaina en negro contra as violencias” foi, outro ano máis, o acto central para concienciar sobre o problema da violencia de xénero.
Pontedeume: Centos de veciños e veciñas transmitiron o seu compromiso con esta loita cunha gran concentración na Praza Real do Concello. Asistiu o alumnado de Secundaria.
A Capela: O concello apoiou a campaña do 25 de novembro con diferentes actos.
Batucada feminista en Cabanas.
Relacionado: As Pontes presenta a curta «Nunca Mais»
