Para este 2020 o Concello de San Sadurniño aprobou actuacións con cargo ao POS+ por un valor superior aos 500.000 euros que o Goberno local quere licitar «o antes posible», tal e como indicou Secundino García. O equipamento do local social de Lamas, cifrado en 109.000 euros, é o último proxecto sufragado cos fondos provinciais de 2019.
O rexedor considera que o papel dos concellos «será fundamental no proceso de recuperación económica posterior á crise» e por este motivo agarda que todos os procesos administrativos de contratación se poidan acelerar «todo o que permita a normativa e a capacidade organizativa do Concello» de cara a amortiguar en parte o impacto do coronavirus sobre o emprego.
O Concello de San Sadurniño presentou ao POS+ un paquete de obras viarias cifrado en algo máis de 44.000 euros, cos que se executará a reparación de pistas nas Calvelas, no Albeiro, na Agra de Abaixo, en Cornide e no Freixo.
Por outra banda, no Plan Complementario -ao que a Deputación destinará fondos procedentes de remanentes- incluíronse tres proxectos por un montante total de 171.000 euros para aglomerar as tres pistas que se encadean desde o Eirexado ata o límite da Capela pasando por Lourido e Quintiá, en Naraío. Tamén se contempla licitar en 150.790 euros a remodelación da Casa da Cultura para redistribuír espazos e climatizala.
Os dous últimos proxectos que se presentados ao Plan Complementario son a merca dun novo tractor para traballos forestais e de prevención de incendios -71.390€- e a ampliación da iluminación led a Marqués de Figueroa, á nova rúa aberta diante do cemiterio, ao Enxerto, ao Outeiro , á pista dos Corrás e á Agra de Arriba. Neste caso o investimento previsto é de 67.000 euros.
