A área sanitaria de Ferrol sufriu nas últimas 24 horas un leve repunte no número de casos activos por coronavirus, pasando de 29 a 31 persoas afectadas. Trátase do primeiro repunte de casos activos desde que se empezou a contabilizar o número neto de contaxiados o pasado 29 de abril.
Aínda así, a de Ferrol segue sendo a área sanitaria menos afectada polo coronavirus, tal e como se desprende do estudo epidemiolóxico realizado polo Sergas, onde se extrae que só un 0,65% da poboación está ou estivo contaxiada polo Covid-19, aproximadamente uns 1.100 veciños.
O número de hospitalizados segue sendo de 4 persoas, mentres que o resto de doentes, 27 casos activos, permanecen nos seus domicilios baixo vixilancia médica telefónica. Tampouco se rexistraron novas altas epidemiolóxicas nas últimas horas, polo que o número de persoas que superaron o virus nas comarcas de Ferrol, Eume e Ortegal segue sendo de 540.
Tampouco creceron os vítimas mortais. Hoxe son xa 12 días sen novos falecementos, polo que o número de mortes relacionadas co Covid-19 segue sendo de 33 persoas, tres das cales faleceron en residencias de maiores.
