As festas de Cedeira encaran a súa recta final, nas xornadas de hoxe a mañá, cun programa repleto de actividades e no que aínda queda moita música. A procesión marítima que seguiría esta mañá á misa tivo que ser suspendida por mor da climatoloxía, porén desde o Concello agardan que a maior parte dos actos previstos poidan ter lugar sen grandes cambios.
Debido a previsión de choiva modificarase a ubicación do espectáculo de danza previsto para esta tarde, a peza “Sofá” da coreógrafa e bailarina Marta Alonso Tejada. Estaba prevista a súa celebración na praza do Floreal, pero o Concello vai avaliar coa produtora levala ao Auditorio ou ao Polideportivo. Informarase da decisión a través do servizo de mensaxería instantánea Cedeira Informa –para recibir as mensaxes desta canle hai que gardar en contactos o número 604 02 42 66 e enviar a palabra “alta”-.
Tamén ten previsto o Concello instalar unha carpa na Praza Roxa, na que actuará a Mekánika Rolling Band, o grupo que inicialmente ía realizar un pasarrúas a partir das nove da noite. Está previsto manter nese lugar os concertos desta noite: Ás 22.30 horas tocarán Garufa Blue Devils Big Band, unha orquesta tributo dos grandes clásicos dos anos 30 e 40, e ás 00.30 horas o escenario acollerá ao grupo de rock e soul Broken Peach.
Mañá mércores, último día de festexos e xornada na que se prevé unha melloría do tempo, estará protagonizado pola tradicional Xira, que se desenvolverá durante todo o día na contorna da ermida de Santo Antón do Corveiro e que será, como sempre, unha ocasión para compartir tempo e viandas con veciños, amizades e familia.
O broche de ouro chegará pola noite coa actuación máis esperada do cartel, o concerto de Tanxugueiras. Este trío de pandereteiras gañou o favor do público galego e nacional tras a súa soada candidatura para o Festival de Eurovisión con “Terra”, canción que ocupou varias semanas as listas de éxitos do país e que marcou o inicio dunha ampla axenda de concertos. A parada da súa xira na vila de Cedeira espérase ás 23.00 horas deste mércores no escenario da Praza Roxa.
