Nova oleada masiva de turistas ás costas de Ferrolterra: veciños de Cedeira, Cabanas ou Valdoviño indignados pola chegada de veraneantes

Os concellos afectados xa están a facer un seguemento dos casos e están propoñendo para sanción a aqueles que non poidan xustificar a súa presenza lonxe do seu lugar de residencia
24254

A situación vólvese a repetir. Xa sucedeu durante a Semana Santa, cando decenas de familias, procedentes a meirande parte delas do interior da península, ocuparon as súas segundas residencias en municipios turísticos de Ferrol, Eume e Ortegal e obrigou aos alcaldes a facer un seguimento e propoñer para sancións a estes turistas. Coa chegada do mes de xuño a situación volve a ser a mesma, aínda coas restriccións de mobilidade impostas polo Estado de Alarma vixentes. Nos últimos dez días son moitos os veciños de municipios como Cabanas, Cedeira, Pontedeume, Ortigueira ou Valdoviño que están amosando o seu malestar pola chegada masiva de veraneantes as súas segundas residencias ou mesmo a casas de alquiler vacacional.

Cedeira foi un dos concellos máis afectados pola primeira oleada do mes de abril e volve a ser agora un dos principais destinos dos turistas de fora de Galicia. O alcalde Pablo Moreda confirma que xa se está a rexistrar varios casos e que, de feito, xa se propuxeron para sanción a algunhas familias procedentes doutras comunidades. «É certo que temos xente da zona de Ferrol e de Coruña, pero moitos outros veñen de fora e é, ademáis dunha ilegalidade, unha irresponsabilidade pola súa parte». Moreda critica que estes turistas poidan recorrer 600 ou 800 quilómetros «sen que ninguén os pare» e despois sexan os concellos os que teñan a responsabilidade de detectalos e sancionalos.

Tamén o alcalde de Valdoviño, Alberto González, confirmou a chegada de moita xente de fora de Galicia ao municipio. «Os veciños están cabreados e nos trasladan que están a atoparse con xente que non son residentes de Valdoviño. Nótase nos supermercados, nas praias e mesmo nos edificios», di o rexedor. Ademáis, apunta González, hai un tránsito inusitado de caravanas nas praias do concello, as cales tamén teñen restrinxida a súa mobilidade. Recoñece o alcalde socialista que non teñen recursos humanos suficientes na Policía para perseguir estas prácticas irregulares, pero que se propoñerán para sanción cando se detecten.

O mesmo ocorre en Cabanas, un dos destinos con máis segundas residencias turísticas da zona. Desde o Concello apuntan que o goteo desde Semana Santa foi constante, pero na última semana, a raíz da entrada de Galicia na Fase 2, sufriron un importante repunte de visitantes. «Nótase nas praias, nos supermercados e, sobre todo, nas terrazas», apunta o tenente de alcalde Iago Varela. Aquí a Policía Local está facendo un seguimento dos casos en colaboración coa Garda Civil, que tamén propuxo a máis dun turista para sanción por non poder xustificar a súa presenza a máis de 600 quilómetros da súa casa.

O asunto chegou incluso ao Congreso dos Deputados da mán do voceiro do BNG Néstor Rego, que preguntou ao presidente de Goberno, Pedro Sánchez, cómo podía ser que centos de familias procedentes de comunidades en Fase 1, como Madrid, estiveran inundando as costas galegas.

«É indignante que os galegos non poidan visitar aos seus familiares noutras provincias, aínda que só sexa cruzar unha ponte, e  permítase a mobilidade irregular cando pode presentar un risco sanitario», denunciou Rego. O propio Pedro Sánchez comprometeuse a estudar o caso e dixo que consultaría co Ministerio de Interior estes desprazamentos irregulares para comprobar se realmente se están a dar.

Publicidad
Resumen de privacidad

Esta web utiliza cookies para que podamos ofrecerte la mejor experiencia de usuario posible. La información de las cookies se almacena en tu navegador y realiza funciones tales como reconocerte cuando vuelves a nuestra web o ayudar a nuestro equipo a comprender qué secciones de la web encuentras más interesantes y útiles.