O Equipo de Atestados do Destacamento de Tráfico de Ferrol, despois dunha intensa investigación, localizou a un condutor que chocou contra unha vivenda en Narón tras unha saída de vía, e que posteriormente se ausentou do lugar do sinistro, supostamente para eludir ser controlado polas Forzas de Seguridade. O inmoble sufriu danos de consideración.
A investigación iniciouse o pasado 7 de xuño, cando testemuñas presenciais da saída de vía dun vehículo chamaron ao 112 para alertar do suceso. Na chamada comunicábase que na estrada DP-5401 (Narón a Val) un turismo impactara contra un muro de pedra e que se baixaron do turismo accidentado dúas persoas, un home e unha muller, e que se foron do lugar.
Ao momento da colisión pronto chegaron efectivos do Destacamento de Tráfico de Ferrol, ás 08:30 horas, que tras realizar a primeira inspección ocular e verificar o denunciado polo alertante, a fuxida do lugar do condutor causante do sinistro, pasaron aviso ao Equipo de Atestados.
As investigacións realizadas a pé de estrada conclúen que o conductor perdeu o control do vehículo atravesando o carril contrario de circulación, saíndose da vía pola súa marxe esquerda, nas proximidades dun paso de peóns e unha parada de autobús, chocando coa cuneta terriza, regresando á calzada e chocando contra un muro de pedra e derrubando dous metros do mesmo.
Iso sumado a que a velocidade máxima do tramo de ocorrencia do sinistro viario é de 50 quilómetros á hora, o mal estado dos pneumáticos do vehículo e que a Inspección Técnica do Turismo figuraba caducada desde o 2019, fai que os instrutores conclúan que a causa do sinistro viario fose unha condución temeraria.
A segunda fase da investigación era dar co condutor temerario. Analizouse o interior do vehículo, manifestacións das testemuñas, consultas nas bases de datos da Dirección Xeral de Tráfico e da Garda Civil, manifestación do titular do vehículo e outras xestións realizadas. Finalmente, os compoñentes do Destacamento de Tráfico de Ferrol deron coa persoa fuxida.
Ás 14:45 horas do mesmo día do suceso os instrutores do Equipo de Atestados tiñan sentado ante eles ao condutor causante do sinistro, o cal, ante as probas que apuntaban cara a el, non puido facer outra cousa que recoñecer os feitos. Ao sometelo ás probas de detección alcohólica arroxou resultado positivo, 0,46 e 0,45 miligramos por litro de aire expirado.
