Lugo Monumental retoma un ano máis as actividades de Samaín, e engade ao seu xa coñecido «truco ou trato» e o fondo fotografico, dúas actividades máis: un obradoiro de pintado de caras e un pasarrúas.
O obradoiro de pintado de caras terá lugar o sábado día 29 dende as 12 da mañá na Praza de San Marcos, fronte á Deputación Provincial. No caso de que o tempo non o permita, trasladarase ao salón de actos da Deputación. O obradoiro consistirá nunha demostración feita polos maquilladores de Aluma Peluquerías, que levarán varios modelos de maquillaxe de Samaín e explicarán aos pais e nais dos nenos cómo facer unha caracterización. É preciso anotarse na libraría infantil El Faro de los Tres Mundos.
O día 31 estará instalado o habitual fondo fotográfico deseñado por Lucía Barrios no local de Ajuar Decoración da Galería que comunica Campo Castelo coa Praza Maior. Ese mesmo día haberá a exitosa actividade de Truco ou Trato
O funcionamento non pode ser máis sinxelo: máis de 60 locais repartirán doces de xeito gratuíto aos nenos de Lugo que os queiran visitar, e para recollelos regalarán tamén máis de medio millar de cestas de cabaza. Cada local entregará uns poucos caramelos xa que ao ser tantos establecementos non tería sentido facelo doutro xeito e a idea é que os nenos visiten o maior número posible. Na web estarán as instrucións de participación e o enlace a un plano de Google Maps coa situación dos establecementos participante. Non fai falta que os nenos acudan caracterizados nin a inscripción previa.
O día 31 entre as 19:30 e as 20:30 horas haberá un pasarrúas do grupo Troula grazas á financiación conxunta, froito da colaboración entre a Asociación Lugo Monumental e o Concello de Lugo a través da iniciativa Localmente Lucense. O pasarrúas será moi vistoso, xa que combina personaxes de medo e incluso lume, polo que animan a todos os lucenses a buscalo polas rúas do centro amurallado.
