A pivot surafricana Sune Swart cumprirá a súa segunda campaña no BAXI Ferrol, despois de chegar a un acordo co club para seguir no conxunto departamental.
O corpo técnico do cadro ferrolán valorou o gran traballo desenvolvido pola xogadora na pasada tempada, na que xogou case vinte minutos por partido, para ofrecerlle a súa continuidade, que aceptou a pivot.
A xogadora destaca sobre a súa renovación co BAXI Ferrol que “decidín seguir xogando en Ferrol porque gozo traballando coa xente deste club. Creo que temos o equipo adecuado para gañar a liga, mentres nos divertimos moito no traballo diario”.
En canto ao que espera achegar na nova campaña, Sune Swart comenta que “o que máis me gustaría achegar ao equipo é unha enerxía positiva e alentadora dentro e fóra da cancha. Espero que todas demos o 100% todos os días e traballemos duro para alcanzar a nosa meta como equipo. Gustaríame ser unha compañeira que poida axudar a que o proceso sexa divertido e agradable”.
Sune Swart convértese na terceira xogadora confirmada polo BAXI Ferrol para a próxima tempada, despois da renovación da canaria Patri Cabrera e da fichaxe da valenciana Irene Garí.
