O cabeza de lista do PSdeG por A Coruña, Pablo Arangüena, explicou na súa visita a Ferrol que a intención do candidato socialista Gonzalo Caballero é levar a cabo “política industrial de futuro para Galicia” que teña no Campus Industrial de Ferrol un dos seus principais polos de accións. O candidato mantivo un encontro coa súa vicerreitora, María Jesús Movilla, no que tamén participaron os candidatos Noa Díaz, Martín Seco e o ferrolán Bruno Díaz.
O responsable socialista criticou o “desleixo amosado polo goberno galego, que converteu o sector industrial galego nun páramo” ao tempo que advertiu que o Campus de Ferrol é un bo exemplo de que «estanse a formar estudantes excelentemente que temos que lamentar que só poden atopar traballo fora da Comunidade Autónoma”.
Sinalou que «Galicia precisa dunha política industrial que o goberno presidido por Feijóo non fixo nos últimos 11 anos, xa que a pesares de ter competencias, orzamentos e capacidade para facela, demostrou que carece de capacidade de xestión e de vontade política”.
Compromiso con Ferrol
O candidato ferrolán, Bruno Díaz, sinalou o compromiso “firme e inequívoco” da candidatura socialista con Ferrolterra, exemplificado na visita ao Campus Industrial para “reivindicar o papel da Universidade pública como faro de coñecemento e igualdade que debe iluminar ao conxunto da sociedade en tempos de maior escuridade como os que vivimos”. Subliñou a Importancia ao desenvolvemento do Campus industrial de Ferrol “dentro de estratexia de futuro deseñada para Ferrol e para Galicia”.
