O goberno local presentou onte aos grupos da corporación o prego definitivo para o novo contrato do servizo de axuda no fogar antes de ser sometido ao pleno da corporación municipal do mes de xullo. O Concello destacou que na nova redacción definitiva do documento se tiveron en conta as achegas da oposición e, de feito, case o 50% do prego conta con propostas do resto de grupos municipais.
Foi o pasado febreiro cando se lles fixo partícipes dun primeiro borrador que tiveron oportunidade de revisar para facer contribucións. Agora, logo de diferentes incorporacións e finalizados os pregos, o documento está listo para ser sometido a aprobación do pleno.
Trátase dun contrato que, en palabras da concelleira de Benestar, Eva Martínez, é “ambicioso” e “moi competitivo”. Ademais, vai “mellorar substancialmente o actual do servizo”. Isto débese, por unha banda, a que se presentará nun só lote co obxectivo de “optimizar recursos”. Por outra, a que o prezo de licitación alcanzará os 5,5 millóns de euros, cun incremento de 2,6 sobre o que se estaba destinando ata agora a este servizo. Esta é a primeira vez que se vai revisar dende o ano 2014. Agora, a partir da súa adxudicación, permitirá atender a un mínimo de 87 usuarios máis.
