O Centro Torrente Ballester acolleu o pasado mércores a inauguración da exposición ‘Orixes. Ferrol castrexo’. Trátase dunha iniciativa da Cátedra de Arqueoloxía e Educación Patrimonial da UDC, que conta co financiamento do Concello de Ferrol. A mostra poderá verse na sala Bello Piñeiro no horario habitual do centro: de martes a sábado, de 11.00 a 14.00 e de 17.00 a 21.00 horas, mentres que os domingos e os festivos permanecerá aberta unicamente polas mañás.
Para Ángel Mato, que acudiu á inauguración xunto á vicerreitora do Campus de Ferrol, María Jesús Movilla,con esta mostra “empézase a dar os primeiros pasos cara un dos obxectivos da cátedra, que é achegar á cidadanía o patrimonio histórico de Ferrol”. O rexedor asegurou que a excelente relación que manteñen Concello e Universidade fai posible este tipo de iniciativas que teñen como resultado “grandes beneficios para a cidade, neste caso no eido cultural, aínda que non é, nin moito menos, o único no que ambas institucións traballan da man”.
O alcalde explicou tamén que a intención é darlles unha continuidade anual ás accións expositivas da cátedra para divulgar os traballos que se van desenvolver en lugares coma o castro de Esmelle e aos achados que se produzan nas excavacións. O convenio entre o Concello e a Universidade para o sostemento da Cátedra Institucional de Arqueoloxía e Educación Patrimonial foi promovido pola concellería de Patrimonio Histórico. Formalizouse o pasado setembro e terá unha duración de catro anos, cunha dotación de 24.000 euros por cada un deles.
O obxectivo da cátedra é crear e xestionar unha escola de arqueoloxía en Ferrol; o estudo, conservación, difusión e posta en valor do patrimonio arqueolóxico en xeral e da cidade en particular, e a organización de actividades e actuacións no ámbito da educación patrimonial en Ferrol. As dúas institucións realizarán actividades e proxectos de forma conxunta en todo tipo de asuntos que resulten de interese para ambas.
