Afundación, a Consellería de Cultura e Turismo da Xunta de Galicia e o Centro Pen de Galicia anuncian o último mes para a presentación de orixinais á décimo oitava edición do Premio de Poesía Afundación, que ten como obxectivo de recoñecer libros de poemas escritos en lingua galega.
A actual conxuntura provocada pola COVID-19 impulsou as tres entidades a adiar a data límite de entrega de orixinais ata o 31 de xullo, co propósito de facilitar o traballo de creación e concentración de todas as persoas candidatas a este galardón. Na seguinte ligazón pódense consultar as bases.
As persoas interesadas en participar poderán presentar obras inéditas, que non concorresen a ningún outro concurso e cunha extensión mínima de 600 versos, ata o 31 de xullo de 2020. O xurado cualificador estará constituído por cinco persoas de recoñecido prestixio no ámbito literario, e como presidente exercerá o titular do Centro Pen de Galicia, Luís G. Tosar.
O texto gañador recibirá un único premio de 6000 euros e será publicado, ademais, na colección «Arte de Trobar», editada polo Centro Pen de Galicia e a fundación galega.
