O Concello de Ferrol recoñecerá o labor da profesora universitaria e investigadora galega Ana Jesús López Díaz (Pobra de Brollón, Lugo, 1965) despois de que o Consello municipal da Muller aprobara por unanimidade a proposta do goberno local de outorgarlle o XV Galardón 8 de Marzo con motivo do Día da Muller. O galardón entregarase nun evento que terá lugar no Teatro Jofre o día 12 de marzo, ás 19.30 horas. A concelleira de Muller e Igualdade, Cristina Prados, expresou a súa satisfacción posto que “foi unha proposta moi ben acollida polo Consello da Muller” e destacou a “excelente traxectoria docente e de investigación” da galega, licenciada en Física e doutora en Ciencias Físicas pola Universidade de Santiago de Compostela, investigadora do Corpo Técnico de Investigación(CTI) e profesora titular da área de Enxenería Mecánica da Universidade da Coruña.
Autora de varios artigos en libros colectivos e revistas especializadas, en 1990 incorporouse como profesora axudante de Física na Universidade da Coruña, con destino na Escola Universitaria Politécnica de Ferrol (Serantes). No ano 1992 comezou como docente nas titulacións de Enxeñería Naval e Oceánica e Enxeñería Industrial na Escola do campus de Esteiro, onde ocupou distintos postos docentes dentro da Área de Enxeñería Mecánica, ata acadar o de Profesora Titular de Universidade, corpo ao que pertence na actualidade.
