O voceiro do grupo parlamentario socialista e deputado lucense, Luis Álvarez, vén de rexistrar unha pregunta para a súa resposta oral no Pleno do Parlamento galego reclamando explicacións “polo comportamento absolutamente inaceptable do Delegado da Xunta en Lugo” coa voceira socialista do goberno e deputada de Réxime Interior, Promoción do Territorio e Turismo, Pilar García Porto, e coa propia institución provincial.
Álvarez lembrou, na iniciativa presentada á Mesa da Cámara Autonómica, que recentemente o delegado territorial da Xunta de Galicia en Lugo, no contexto dunha reunión convocada para analizar o convenio colectivo do Consorcio de Bombeiros Provincial, esixiu que se presentase na mesma o presidente da Deputación de Lugo, José Tomé Roca, ao considerar que a participación da deputada Pilar García Porto “non era suficiente”.
“Con independencia de que parece ignorar que a súa presenza nesa reunión se debía á súa condición de delegado do Goberno galego, e polo tanto actuando en representación do Presidente da Xunta de Galicia, ao igual que o facía a deputada Provincial, en representación do Presidente da Deputación de Lugo”, recalcan os socialistas, “fixo afirmacións que evidencian unha falta de respecto institucional que compromete á Xunta de Galicia”.
O PSdeG subliña que resulta “absolutamente inadmisible” que o delegado territorial se pronunciase en termos como “Dile a Pilar que mueva el culo y venga para la reunión, que deje de hacer tiempo en el despacho, que nos conocemos”. Explican que termos que, “resultando impropios en calquera relación, o son aínda máis entre institucións públicas, engadindo gravidade se proveñen dos seus máximos representantes”.
Ante o comportamento “absolutamente inaceptable” do delegado territorial da Xunta de Galicia en Lugo, os socialistas preguntan no Parlamento ao Goberno de Alfonso Rueda se considera necesaria algunha actuación.
