O goberno local de Ferrol ten proxectada unha intervención para acondicionar e reordenar a zona leste do parque Albatros, unha parcela localizada próxima á rúa Xaquín Bruquetas, en Santa Icía. A superficie da parcela onde se sitúa ocupa 7.088 metros cadrados, actuándose nesta primeira fase na zona leste, cunha superficie de preto de 3.700 metros cadrados.
A actuación busca mellorar as condicións de uso deste espazo por parte dos veciños, facilitando o tránsito e eliminado os elementos que poidan supoñer un perigo. Para elo, substituirase o actual pavimento por outro de terrizo compactado, acondicionarase a zona infantil, protexeranse as raíces das árbores cunha solución sobreelevada que de continuidade á zona de paseo, plantaranse cinco novas árbores (loureiro ou similar) de folla perenne para xerar espazos de sombra nas zonas de estar e contémplanse novos alcorques.
O proxecto tamén recolle o desprazamento das luminarias de maneira que permitan iluminar as novas zonas expostas, o acondicionamento do mobiliario urbano (coa súa limpeza e recolocación), novas papeleiras e unha fonte. Ademais está prevista a colocación de mesas de picnic na zona próxima ao parque infantil. A vontade do goberno local é dar “unha nova vida ao parque”, indicou a concelleira de Obras e Servizos, Ana Lamas. Conta cun investimento aproximado de 33.500 euros.
