A concelleira de Muller e Igualdade, Cristina Prados, presentou hoxe «Ferrol abre a porta contigo», a nova campaña contra a violencia machista promovida pola administración local no marco do Pacto de Estado contra a Violencia de Xénero. Esta iniciativa créase cun dobre obxectivo: por unha banda, que as mulleres que estean sufrindo violencia se identifiquen como vítimas, e por outra, que coñezan os recursos que están á súa disposición tanto no Concello coma no resto de Administracións do Estado.
Tal e como explicou a edil, o lema representa unha man tendida para axudar ás mulleres a saír dunha espiral para a que non ven un fin, abrindo xunto a elas unha porta violeta para amosarlles que hai outra vida na que poden ser libres. O principal motivo polo que o Concello lanza agora esta campaña é que durante o confinamento puxéronse en marcha varias iniciativas a nivel nacional e autonómico para protexer ás mulleres que estaban pasando o estado de alarma pechadas cos seus agresores. Agora é o momento de darlles continuidade para complementalas e que a mensaxe permaneza visible.
«Ferrol abre a porta contigo»
Dita iniciativa desenvolverase en dúas fases diferenciadas. A primeira céntrase na identificación das vítimas, apoiándose en tres ferramentas: un vídeo divulgativo, un cartel e publicidade nos medios de comunicación locais. As mensaxes foron elaboradas por mulleres que sufriron a violencia de xénero e que pasaron polo Centro de Información á Muller, algo que a concelleira quixo pór en valor, xa que o contido se basea nas súas experiencias e en frases reais de maltratadores.
Os perfís aos que está dirixida son dous. Por unha banda, unha muller máis nova, de entorno urbano á que está dirixido o vídeo, pensado para a súa difusión sobre todo aproveitando o gran impacto que teñen as redes sociais. E por outra, unha máis madura e do medio rural na que se centra o cartel, que se distribuirá por locais sociais, establecementos hostaleiros e comerciais. O Concello conta para a súa difusión coa colaboración da Diócese de Mondoñedo-Ferrol e da Xerancia Integrada de Ferrol, que facilitaron a súa colocación en igrexas e centros de saúde.
En paralelo, vaise estrear o Instagram da Casa da Muller, cuxa primeira publicación será o vídeo realizado. A segunda fase da campaña estará dedicada á identificación de recursos, incluídos os de carácter económico. Iniciarase dentro de dúas semanas coa edición dunha guía de recursos en clave local e autonómica para que as vítimas coñezan de primeira man todo o abano de servizos e axudas ás que poden recurrir. Inclúe a impresión do documento, a súa difusión en formato dixital e a creación dun pequeno documental no que as técnicas do Centro de Atención á Muller e representantes das entidades explican de primeira man ás mulleres toda a axuda que poden recibir.
