O Concello de Cabanas, a través da Concellaría de Igualdade, vén de anunciar a súa participación no proxecto EspadELA, unha escola de empoderamento feminino destinado a mulleres do rural.
A través de catro liñas formativas que combinan formación presencial e a distancia, o proxecto busca crear espazos de traballo no plano persoal que melloren as condicións de vida das mulleres do rural, coa intención de que estas mudanzas poidan espallarse e compartirse nunha rede de sororidade e recoñecemento feminino.
Os talleres desenvolveranse os martes de 16.00 a 18.00 horas, desde o 29 de setembro até o 1 de decembro. Para participar, é preciso inscribirse antes do 25 de setembro a través do correo [email protected] ou no teléfono 649 075 263.
Con voz propia
Neste primeiro curso traballarase arredor da autoestima, da participación, do liderado e da prevención de violencias machistas. Abordarase o recoñecemento persoal das mulleres como suxeitos de dereitos políticos, sociais e civís.
Enredad@s
Centrado nas novas tecnoloxías, neste curso realizarase unha aproximación ás posibilidades que ofrece Internet e as redes sociais traballando o manexo práctico de dispositivos móbiles que facilitan a comunicación e o traballo en rede.
Habitando o noso corpo
Esta terceira reunión xirará arredor do autocoñecemento, o autocoidado e a expresión emocional. Utilizaranse ferramentas da biodanza, da atención plena e do ioga integral, como medios para chegar a esta conexión sempre dende o goce e o autocoidado.
Saberes en común
No último curso farase unha recuperación e posta en valor de saberes, coñecementos e experiencias das mulleres sobre os diversos traballos que desenvolveron ao longo da súa vida, así como do territorio que habitan.
