A Deputación da Coruña concedeu este ano 48 bolsas de investigación e de perfeccionamento de estudos artísticos, unha convocatoria á que destina un total de 480.000 euros. Cada persoa beneficiaria recibirá unha achega de 10.000 eurospara completar a súa formación, desenvolver proxectos de investigación ou continuar a súa especialización artística.
O acto de entrega dos diplomas celebrouse no Pazo Provincial e contou coa participación do presidente da Deputación, Valentín González Formoso, quen destacou a importancia de apoiar o talento da provincia e facilitar que mozos e mozas poidan continuar a súa formación con respaldo económico.
Dúas liñas de axudas
A convocatoria distribúese en dúas modalidades. As bolsas de investigación suman 20 axudas, cun investimento de 200.000 euros, repartidas entre as áreas de artes e humanidades, ciencias da saúde, ciencias sociais e xurídicas, estudos de xénero, ciencias, arquitectura e enxeñaría.
Pola súa banda, as bolsas de perfeccionamento de estudos artísticos ascenden a 28, cunha dotación global de 280.000 euros. As persoas beneficiarias desenvolven a súa formación en disciplinas como o audiovisual, a danza, a ilustración e as artes plásticas, a música ou o teatro e a interpretación.
Máis bolsas e maior contía
A Deputación lembra que nos últimos anos incrementou tanto o número de axudas como a súa dotación económica. A convocatoria pasou de 40 a 48 bolsas, mentres que a contía individual aumentou de 8.000 a 10.000 euros.
Segundo explicou Formoso durante o acto, o obxectivo é contribuír a que a falta de recursos económicos non sexa un obstáculo para que investigadores e artistas poidan continuar a súa formación ou desenvolver os seus proxectos, tanto en Galicia como noutros centros de referencia.