A Deputación da Coruña apoiará un proxecto pioneiro de conservación das especies vexetais ameazadas da provincia en colaboración co Consello Superior de Investigacións Científicas (CSIC). A iniciativa, que será desenvolvida pola Misión Biolóxica de Galicia (MBG-CSIC) ao longo de 2026, permitirá avanzar no estudo e preservación dos solos e dos microorganismos asociados ás plantas en risco de desaparición, considerados fundamentais para garantir a súa supervivencia e favorecer a recuperación dos ecosistemas
Investigación para protexer a biodiversidade
O convenio, aprobado polo pleno da Deputación, contempla unha achega de 20.000 euros por parte da institución provincial, o que supón o 77,68 % do orzamento total do proxecto, cifrado en 25.744,60 euros.
O traballo centrarase non só na conservación das especies vexetais incluídas no Catálogo Galego de Especies Ameazadas presentes na provincia, senón tamén na análise dos solos nos que medran e das comunidades de microorganismos que conviven con elas, un elemento clave para manter a fertilidade do solo, favorecer a adaptación ao cambio climático e mellorar a restauración dos ecosistemas.
Corenta e dúas especies na provincia
Na actualidade, o Catálogo Galego de Especies Ameazadas recolle 65 especies en Galicia, das que 42 están presentes na provincia da Coruña. Delas, 24 atópanse en perigo crítico de extinción e outras 18 están catalogadas como vulnerables, unha situación que evidencia a necesidade de reforzar o coñecemento científico e as medidas de conservación.
O proxecto permitirá elaborar unha base de datos coa información dispoñible sobre estas especies, recompilar e analizar mostras de solo, estudar as comunidades microbianas asociadas tanto ao terreo como ás propias plantas e conservar material xenético para futuras investigacións e posibles actuacións de restauración ecolóxica.
Coñecemento para mellorar a xestión ambiental
A iniciativa pretende ofrecer novas ferramentas científicas que contribúan a orientar as políticas de xestión ambiental e reforzar a protección das especies máis vulnerables da provincia.
Ademais do labor investigador, o proxecto incluirá accións de divulgación dos resultados mediante publicacións científicas, encontros especializados e a creación dun catálogo das mostras conservadas, co obxectivo de facilitar futuras investigacións e seguir avanzando na conservación da biodiversidade galega.
