O concelleiro e portavoz do BNG no Concello da Coruña, Francisco Jorquera, confirmou que non optará á alcaldía nas próximas eleccións municipais de 2027 e que pechará o seu ciclo político no consistorio ao remate deste mandato.
“No día de onte lle trasladei ao Consello Local a miña decisión de non ser candidato á Alcaldía nas vindeiras eleccións”, anunciou Jorquera, que subliñou que esta é unha “decisión longamente meditada” e motivada por razóns persoais e familiares.
O concelleiro explicou que desexa dedicar máis tempo á súa vida persoal e familiar e que, en maio de 2027, terá preto de 66 anos, idade que considera adecuada para retirarse da corporación. “A Coruña necesita persoas con forzas, ganas e ilusión, capaces de lle dar un novo impulso á nosa cidade”, destacou.
Respecto ao seu futuro inmediato, asegurou que seguirá exercendo como concelleiro ata terminar o mandato, aínda que poñerá á disposición o seu cargo de portavoz do grupo municipal se o BNG considera oportuno un relevo antes das eleccións.
Na súa comparecencia, Jorquera tamén agradeceu a confianza que o BNG e a cidadanía depositaron nel ao longo da súa traxectoria, tanto como candidato á alcaldía como en anteriores responsabilidades parlamentarias. Subliñou a importancia de exercer a política como ferramenta para o ben común e de manter a honestidade e o respecto á cidadanía en tempos de populismos e degradación política.
