A Mancomunidade de Concellos da Mariña Lucense distribúe máis de 100 exemplares do testamento do mariscal Pardo de Cela entre centros educativos, bibliotecas públicas da comarca e o futuro centro de interpretación, situado no Castelo de Castro de Ouro en Alfoz.
Ao abeiro do Plan de Sostibilidade Turística na Mariña Lucense, cofinanciado pola propia Mancomunidade coa colaboración da Deputación de Lugo, a Xunta de Galicia e a Secretaría de Estado de Turismo, o ente supramunicipal vén de apoiar a re impresión da publicación ‘El testamento del marsical Pardo de Cela. Noticia del hallazo y edición documental’, que asina Eduardo Pardo de Guevara y Valdés. Trátase dunha obra que da conta do achado do testamento e codicilo outorgado o 1 e 3 de outubro de 1483 polo mariscal, contextualizando,valorando e editando o propio documento e poñendo en valor a súa significación histórica.
Desde a Mancomunidade indican que “se trata dunha acción enmarcada no proxecto de reactivación da Ruta Pardo de Cela, que está a ser desenvolta no territorio a cargo do vixente Plan de Sostibilidade Turística na Mariña Lucense e que inclúe o deseño e execución do centro de interpretación de Pardo de Cela no Castelo de Castro de Ouro, en Alfoz, para explicar unha das figuras máis emblemáticas da historia medieval de Galicia.
Tamén inclúe a reactivación da coñecida Ruta Pardo de Cela –roteiro promovido nos anos XX pola Asociación Mundo Galea-, na que se traballa para darlle un enfoque eminentemente histórico e de maior alcance xeográfico ao longo da comarca a través de accións como a revisión dos espazos significativos relacionados coa vida do mariscal e situados en diversos concellos mariñáns, a redefinición do itinerario ou a colocación de sinais.
Os exemplares do testamento de Pardo de Cela foron enviados aos colexios de educación infantil e primaria, institutos de educación secundaria, e bibliotecas públicas da Mariña Lucense, e a aquelas outras institucións que polo seu interese documental e histórico o requiran, para que poidan contar con esta publicación.
