A concellería de Muller e Igualdade de Ferrol solicitou á Xunta o pasado mes de xuño unha subvención de 8.000 euros para poñer en marcha “Ferrol en Feminino”, un programa de sensibilización, información e difusión sobre igualdade e prevención da violencia contra mulleres.
Tal e como se explicou o 2 de xullo na comisión de Benestar Social, Igualdade, Muller, Xuventude e Patrimonio Histórico, estase a esperar resolución do Goberno autonómico. O obxectivo do plan Ferrol en Feminino é poñer en valor ás mulleres ferrolás que na actualidade están exercendo profesións de interese para a cidade.
Tamén pretenden dende o Concello fomentar a concienciación social sobre a súa traxectoria e crear unha rede de apoio a mulleres, especialmente para aquelas en risco de exclusión e en situación de vulnerabilidade. No caso de recibir a subvención, desde a concellería de Muller e Igualdade elaborarase unha relación de obras literarias e traballos de investigación realizados por mulleres e deseñarase un programa de conferencias.
FInalmente levaranse a cabo exposicións con obras de artistas ferrolás para dar a coñecer as súas creacións. O obxectivo é poñer en valor o traballos das nosas veciñas e darlles o recoñecemento que merecen co apoio do Concello.
