Profesionais da Área Sanitaria de Ferrol continúan a participar no estudo nacional EPICOS, para a prevención do desenvolvemento da enfermidade por SARS-Cov-2 (Covid -19) mediante a administración profiláctica de alternativas farmacolóxicas en persoal de alto risco de contacto. É un ensaio clínico aleatorizado, controlado con placebo. Este estudo dábase a coñecer a mediados de abril, e iniciouse o recrutamento de voluntarios no propio complexo.
Trátase dun ensaio coordinado polo Ministerio de Sanidade e a Axencia Española do Medicamento e Produtos Sanitarios para mellorar a protección dos profesionais que atenden ou están en contacto con pacientes infectados polo novo coronavirus. O estudo conta coa participación de 65 hospitais de 13 comunidades autónomas de territorio nacional. A Unidade de Enfermidades Infecciosas do Servizo de Medicina Interna coordina o traballo no Complexo Hospitalario universitario de Ferrol. Este estudo, entre os máis grandes destas características, permitirá avaliar diferentes alternativas farmacolóxicas para previr o desenvolvemento da enfermidade Covid-19 e mellorar a protección do profesional.
O obxectivo principal, polo tanto, é avaliar o risco de enfermidade no persoal ó que se lle administra eses medicamentos e o correspondente placebo. Como explican as persoas do equipo investigador implicadas no proxecto, “neste estudo imos avaliar a eficacia de dous fármacos (Emtricitacina/Tenofovir e a Hidroxicloroquina) na prevención da infección por coronavirus no persoal exposto. Estes fármacos -explican- téñense empregado dende hai anos noutras patoloxías nas que temos moita experiencia co seu uso, e teñen un perfil de seguridade moi alto”.
Tecnicamente, indican, “é un ensaio clínico aleatorizado, controlado con placebo. Isto quere dicir que a eficacia destes fármacos só se pode avaliar se se comparan cun placebo, de xeito que se estableceron catro ramas de tratamento aleatorio. Nunha delas, as persoas participantes no estudo tomarán os dous fármacos; noutra, un dos fármacos con placebo; na terceira rama, o segundo dos fármacos con placebo; e, na última das ramas do estudo, os dous placebos.
Ademais, o ensaio é cego, nin o participante nin o investigador coñecen que é o que está a tomar nese momento, “só se saberá ó final do estudo; e iso dálle fortaleza para dicir se eses fármacos son ou non eficaces no seu obxectivo de prevención”, afondan. Os dez participantes realizaron xa o primeiro dos controis e farán dous máis con diferencia de entorno a un mes cada un.
Discussion about this post