Os tres candidatos de Ferrolterra polo BNG nas eleccións autonómicas fixeron hoxe un pequeno acto na casa do Mar de Ferrol para explicar o programa que o partido nacionalista quere implementar na comarca. O cabeza de lista número 5 do BNG pola Coruña, o ferrolán Ramón Fernández «Món», acompañado polas outras dúas persoas da comarca de Ferrolterra que conforman a canditura, Xiana González de Narón, e Tino Seco de Ares explicou coa ría como escenario de fondo que «unha soa imaxe, pódense ver todos os recursos e potencialidades dunha comarca que pide a gritos unha solución a unha situación de crise que se está a volver estrutural».
Na súa intervención recalcou que tódas facianas da ría, como o porto, a pesca e o marisqueo, o turismo, o patrimonio natural e arquitectónico e os sectores naval, pesqueiro ou enerxético, «deben ser parte dun plan de emerxencia pola recuperación económica da nosa comarca». O candidato do bloque recalcou a posta do partido pola investigación e a innovación, “elementos que deben inxectarse a sectores como o naval ou o enerxético, levando a cabo así un proceso de descarbonización ordenado e con unha transición xusta e axeitada na nosa comarca».
«Ferrolterra debe revertir a situación actual, tanto no social como no económico, e deixar de formar parte dese ranking onde figuran as zonas máis envellecidas de Europa, e ser capaces de ofrecer oportunidades aos centos de mozos e mozas que tiveron que abandonar esta comarca, así como defender o modelo público en servizos e asitencia de carácter social -sanidade e ensino, residencias de maiores e centros de día de atención», concluiu Mon neste pequeno acto de campaña.
