O índice de criminalidade no Concello de Oroso é de 17,3 infraccións penais por cada 100.000 habitantes, case a metade da taxa galega, situada en 29,7, e moi por debaixo da do conxunto do Estado, que é de 39,2. Isto amosa que Oroso é un dos concellos máis seguros de Galicia.
A pesares desta situación, o concello decidiu ir máis aló e puxo en marcha hai meses novas medidas de reforzo, como as patrullas nocturnas da Policía Local durante a fin de semana para controlar os botellóns. “Somos os primeiros interesados en continuar sendo un concello seguro, polo que manteremos esta iniciativa”, explicou o alcalde, Luis Rey Villaverde.
O propio delegado do Goberno en Galicia, José Miñones, e o alcalde de Oroso acordaron reforzar o mes pasado a presenza policial no concello para manter a actual garantía da seguridade pública. O consenso chegou nunha xuntanza que da resposta a unha petición do Executivo local.
O delegado garantiu o traballo da Garda Civil, que dará continuidade ao intenso esforzo que realiza o Concello de Oroso coa Policía Local. Ambos mandatarios coordinaron o dispositivo de seguridade e acordaron un reforzo para vindeiras datas.
Como nova medida para coordinar as accións neste ámbito, o Concello de Oroso contará cunha Xunta Local de Seguridade.
