O Entroido máis tradicional da Costa da Morte volve un ano máis: entre este venres e o vindeiro martes, alén dos desfiles e concursos e disfraces, haberá oco para a historia, para degustar un cocido e para diferentes actuacións.
“Ide preparando os vosos disfraces e animádevos a vivir o mellor Entroido da Costa da Morte”, convidan dende o Concello de Fisterra. A programación xa comezara o pasado sábado cun Gran Cocido de Entroido a partir das 14:00 horas no Campo da Festa de Sardiñeiro con animación musical.
Este venres foi a quenda dos desfiles escolares: ás 10:30 horas sairon tanto do CEIP Mar de Fóra como do CEIP Areouta de Sardiñeiro e ás 15:30 horas fixérono os do Colexio Nuestra Señora del Carmen de Fisterra.
Xa o sábado haberá desfile a partir das 18:00 horas, cando as comparsas se concentrarán na Cruz de Baixar antes de comezar o seu percorrido acompañadas por Rapacollón’s Big Band e a Charanga TNT. O pregón será na Praza da Constitución a cargo da Escola de Teatro Municipal de Fisterra. O fin de festa estará amenizado pola Discoteca Móbil Super Fabrik na carpa do porto de Fisterra.
O domingo 19 de febreiro na Praza da Constitución será a quenda dos concursos de disfraces tanto infantís como de adultos, acompañados ademais por animación musical, obradoiros de chapas, tatuaxes e un palomitero a cargo da empresa Divir-TT. O luns ás 10:30 horas haberá un desfile de entroido da escola infantil A Galiña Azul e a partir das 17:00 horas, circo na rúa no porto co espectáculo “Cirqueiras”, con aéreos, danza, música e humor.
O peche de ouro chegará o martes 21 ás 18:00 horas da man do tradicional concurso de comparsas no porto. Haberá premios de 1.400, 1.100 e 800 euros para as tres primeiras e o resto de participantes terán unha axuda económica de 300 euros. O certame estará presentado por Cayetano Lledo e, ó remate, haberá animación musical a cargo da Charanga A Tripulasión.
