O Concello de Muxía vén de presentar o Entroido 2023, que chega con opcións e actividades pensadas para todos os gustos e idades, dende concursos de disfraces, música ou obradoiros de entroido para a conciliación ata o regreso do tradicional Enterro do Percebe.
“Queremos animar a toda a veciñanza a disfrazarse e a gozar deste entroido participando en todas as actividades que temos organizadas”, convidou a concelleira de Cultura, Olalla Benlloch, durante a presentación do programa.
A programación comezará o sábado 18 de febreiro ás 17:00 horas no Paseo Marítimo coa Gala Concurso de Entroido, presentada pola artista Tania Fuegho e amenizada por Disco Móvil CDC. As 17:00 horas será a quenda do concurso de disfraces infantil, ás 18:30 horas do de adultos, ás 19:30 horas do de grupos, ás 20:00 horas do concurso de comparsas e, por último, ás 21:15 será o sorteo da cesta de entroido.
As persoas participantes nos concursos de disfraces infantil e de adultos deberán inscribirse o propio día da gala na mesa do xurado. Asimesmo, as persoas participantes no concurso de grupos e comparsas terán que inscribirse no Concello ou na sede electrónica ata o 16 de febreiro.
Durante a gala toda persoa que vaia disfrazada poderá recoller unha rifa para o sorteo da cesta de Entroido, mentres que na mesa do xurado tamén haberá unha degustación de doces de entroido.
Os premios na categoría infantil serán de 100, 50 e 25 euros, en adulta de 150, 100 e 50 euros e para a categoría grupal haberá un único premio de 200 euros e esixirase a participación dun mínimo de catro persoas, sen obriga de actuación musical nin coplas.
Para as comparsas é obrigatorio que participen un mínimo de cinco personas cunha actuación escénica, musical ou baile. Os premios serán de 900, 400 e 200 euros.
Obradoiros Concilia de Entroido
Para as xornadas dos días luns 20, martes 21 e mércores 22 de febreiro están previstos os obradoiros de Entroido para favorecer a conciliación nas datas festivas. As actividades terán lugar en horario de 11:00 a 13:00 horas e será necesario realizar unha inscripción previa no Concello do 6 ao 15 de febreiro. As prazas para a actividades son limitadas.
O Entroido finalizará co tradicional Enterro do Percebe, previsto para o mércores 22 de febreiro. Comezará ás 17:00 horas cos “Contos de rúa” con Caxoto no Edificio Servizos Múltiples. A partir das 18:00 horas haberá unha procesión co percebe polas rúas de Muxía ata o Paseo Marítimo, onde os asistentas poderán contemplar a queima e gozar dunha gran chocolatada.
