A Deputación da Coruña celebrará ao longo do mes de xuño unha nova edición da Festa da Música, unha iniciativa que achegará a música galega a distintos puntos da provincia mediante un programa composto por quince concertos noutros tantos concellos. O ciclo, impulsado pola Área de Cultura, enmárcase na conmemoración do Día Europeo da Música, que se celebra o 21 de xuño, e busca reforzar a programación cultural de proximidade e o apoio á creación musical galega.
A deputada de Cultura, Natividade González, destacou que a Festa da Música reflicte o compromiso da institución provincial coa descentralización da oferta cultural e co apoio aos artistas galegos. Neste sentido, subliñou a colaboración cos concellos para garantir que a actividade cultural chegue a todo o territorio e contribúa a poñer en valor a riqueza e a diversidade da escena musical galega.
Cinco propostas musicais en apoio á música galega
A programación abrirase os días 5, 6 e 7 de xuño con Merendola desconcertante, do Cuarteto Debiselas, que chegará a Santiso, Malpica e Rianxo. A formación volverá actuar o 18 de xuño en Muros, o 19 en Padrón e o 28 en Cerceda.
Pola súa banda, Anxo Araújo ofrecerá tres concertos dentro do ciclo: o 23 de xuño en Cedeira, o 26 en Arteixo e o 27 en Cee. Faia Díaz presentará o seu espectáculo Alvela o 14 de xuño en Melide e o 28 de xuño en Ribeira.
O proxecto Traspielas, liderado por Su Garrido Pombo, fará parada o 19 de xuño na Pobra do Caramiñal e o día 21 en Carballo. A programación completarase coa actuación de Belém Tajes, que presentará o seu primeiro disco, Amar o mar, o 19 de xuño en Vimianzo e o 20 en Ortigueira.
Con esta nova edición da Festa da Música, a Deputación da Coruña reforza a súa aposta pola difusión da música galega e pola colaboración cos concellos para impulsar unha programación cultural estable e accesible en todo o territorio provincial, coincidindo coa celebración do Día Europeo da Música.