Un debate arredor da diversidade e a inclusión no eido audiovisual. Iso é o que propón o III Foro da Industria Galega do Audiovisual (FIGA).
Organizado pola Academia Galega do Audiovisual co apoio do Concello da Coruña e da Deputación, o encontro celebrarase do 5 ao 7 de novembro na cidade herculina, concretamente no Espacio Avenida e nos Cantones Cines. Durante tres días, creadoras e profesionais galegas e estatais suman forzas para abordar os desafíos e oportunidades dun audiovisual máis plural.
Tal e como salientou na presentación do evento Carmen Méndez, vicepresidenta da Academia Galega do Audiovisual, «FIGA naceu como un espazo de diálogo e crecemento colectivo«. É por iso que esta nova edición combinará proxeccións, charlas e mesas redondas arredor da diversidade.
O programa inclúe a performance Flúor significa escuridade, debates sobre producións máis plurais e sobre temas como a accesibilidade, o casting inclusivo ou a identidade na creación, ademais das proxeccións de Sorda e La Furia, seguidas de coloquios cos seus equipos.
Aquelas persoas que o desexen xa poden inscribirse a través do formulario dispoñible na web da Academia Galega do Audiovisual. As entradas teñen un prezo de 5 euros por día que se devolverán integramente ás persoas asistentes.
