O Carballo Interplay 2026 xa publicou o seu programa completo e confirma por que é o festival de referencia da cultura dixital en Galicia e un dos máis innovadores do Estado. Do 16 ao 19 de abril, Carballo converterase no epicentro das novas narrativas, da creación de contido e das tendencias que están a redefinir o ecosistema online, cunha programación que combina activismo en redes, intelixencia artificial, podcasts en directo, estreas de series, divulgación e unha Sección Oficial que reúne algunhas das propostas máis frescas da creación audiovisual independente.
O xoves 16 comezará ás 11:00 no Mercado de Carballo cunha conversa sobre crear contido en galego nas redes, protagonizada por Prado Rúa e Konachadas, que abrirán o debate sobre identidade, comunidade e creatividade na esfera dixital. Ás 12:00, Marina G. Canedo impartirá un obradoiro de activismo creativo, centrado en como as redes se converteron nun espazo clave para a mobilización social. Xa pola tarde, ás 17:00, presentarase a revista Clara Corbelhe #5, dedicada á soberanía dixital, e ás 18:00 terá lugar a estrea de “Epidemia Invisible”, a nova serie de Román Varela. A xornada pecharase ás 19:00 coa proxección do primeiro bloque da Sección Oficial, que reúne producións internacionais emerxentes.
Charla sobre IA e podcasts
O venres 17 abrirá ás 10:00 cun dos encontros máis esperados: a charla de Maldita titulada “Isto non é ciencia ficción: IA e traballo en medios dixitais”, que examinará o impacto real da intelixencia artificial no xornalismo e na creación de contido. Ás 11:30, unha mesa redonda sobre o estado do podcast en España reunirá representantes de Prisa, Tresdeu Media, Festivalpod e RNE para analizar formatos, audiencias e modelos de negocio. A tarde comezará ás 16:00 cun panel sobre novos medios e algoritmos, seguido ás 17:00 pola proxección do segundo bloque da Sección Oficial. Ás 19:00, Raquel Piñeiro e Patricia Blanco ofrecerán un show especial sobre Sexo en Nueva York, antes da preestrea galega de “Millennial Mal”, programada para as 20:00. A xornada culminará ás 21:00 co directo de Bimboficadas, o podcast de Samantha Hudson e María Barrier.
Divulgación e saúde dixital
O sábado 18 comezará ás 10:00 coa charla “Scroll, scroll, STOP”, centrada nas novas dinámicas da divulgación en redes e na necesidade de repensar formatos nun contexto de saturación informativa. Ás 11:30, a conversa “Internet chiquito” afondará nos espazos hostís da rede e no impacto emocional que teñen sobre as usuarias máis novas. O terceiro bloque da Sección Oficial proxectarase ás 13:00, completando a sesión matinal. Xa pola tarde, ás 17:00, celebrarase un debate en directo sobre Twin Peaks, seguido ás 18:00 dunha nova sesión do Código Fonte Audiovisual con Lúa e Zeltia Mosquera. Ás 19:30, o podcast Pop y Muerte ofrecerá un directo especial, e ás 21:00 o músico Pantis presentará o seu disco memoria nova (2025) nun concerto que pechará a xornada.
Sesión vermú e premios
O domingo 19 comezará ás 12:00 coa entrega de premios do Carballo Interplay 2026, presentada por Lorena Iglesias, que tamén protagoniza unha das estreas destacadas desta edición. Tras a gala, ás 13:30, o festival despedirase cunha sesión vermú na Xamonería a cargo de Monkey Mambo Club, que ofrecerá unha selección musical que viaxa polos anos 50 e 60.
Co seu programa máis transversal e ambicioso, o Carballo Interplay 2026 reafirma o seu papel como un dos grandes laboratorios de ideas sobre cultura de internet, creación de contido e novas narrativas. A combinación de estreas, debates, formación, música e podcasts en directo consolida o festival como un espazo imprescindible para comprender cara onde se move a comunicación dixital contemporánea e cales serán as tendencias que marcarán os próximos anos.
