A alero arxentina Andrea Boquete formará parte do persoal do BAXI Ferrol a próxima tempada. A xogadora, de 1,80 metros e 29 anos, é unha fixa da selección do seu país desde o ano 2010 e tratará de portar a súa experiencia para axudar ao conxunto ferrolán a buscar o ascenso á máxima categoría.
Andrea Boquete xa xogou en España nas filas do Bembibre, en Liga 2, e na liga Feminina, nas filas do Cadi A Seu, mentres que a pasada campaña estivo no Patatas Hijolusa de León, sendo unha das xogadoras máis destacadas da competición, cunha valoración media de 19,6, con 17,6 puntos e 8,2 rebotes. Ademais, logrou o record de valoración nun partido con 46.
A xogadora destaca sobre a súa fichaxe co BAXI Ferrol que “é un club cunha traxectoria incrible, onde sempre tivo proxectos interesantes. Cativou a miña atención desde un principio. Estou moi agradecida de que se fixaron en min para que sexa parte deste gran equipo”.
En canto ao que espera achegar na nova tempada, Andrea Boquete manifesta que “quero achegarlle ao equipo toda a miña experiencia e poder transmitir tranquilidade e seguridade dentro da pista. Quero dar o máximo como xogadora e como persoa. Desexo seguir crecendo e estou segura de que estou no lugar correcto”.
Polo que se refire ao cambio de obxectivo con respecto ao que tiña a pasada campaña no club leonés, a beirado internacional comenta que “cada club ten as súas aspiracións e as súas metas. Fichar no BAXI Ferrol é un fermoso reto. Quero gozar do camiño e facer todo o que se me pida”.
Andrea convértese na quinta xogadora confirmada polo BAXI Ferrol para a próxima campaña, despois das renovacións de Patri Cabrera, Natalia Rodríguez e Sune Swart e da fichaxe de Irene Garí.
