A alero valenciana Irene Garí xogará no BAXI Ferrol a próxima tempada, o que permite ao conxunto departamental conseguir un reforzo de luxo para o seu novo proxecto. A xogadora, que ten 25 anos e mide 1,85 metros, provén do Valencia Basket, no que estivo as tres últimas campañas, a primeira en Liga Feminina 2, conseguindo o ascenso e a última participando na Eurocup.
Irene comenta sobre as razóns que lle levan a vir ao Baxi Ferrol que “a confianza que Liño me transmitiu desde o primeiro momento que soubo que non seguía no Valencia Basket, e o proxecto para esta tempada que o club ten para ascender á liga Feminina Endesa, foron as claves para tomar a decisión. Teño moitas ganas de empezar esta nova etapa e creo que imos gozar moito do camiño a próxima campaña”.
O feito de que a xogadora decida baixar á liga Feminina 2 pode sorprender a moita xente despois de dous anos na liga Feminina e da súa participación en Eurocup, pero a xogadora é clara cando destaca que “non o sei e tampouco me preocupa o que pense a xente. Tomei a decisión pensando onde cría que ía ser máis feliz, podendo gozar outra vez xogando ao baloncesto”.
En canto ao que pode achegar ao equipo, a deportista valenciana sinala que “me considero unha xogadora moi comprometida e implicada, que pode achegar moita intensidade e ritmo ao equipo. Coñezo moito o estilo de xogo de Liño e creo que encaixa ben na miña maneira de xogar”.
Irene Garí convértese na segunda integrante do persoal do BAXI Ferrol, tras a renovación da canaria Patri Cabrera.
