Os efectos colaterais da crise sanitaria do coronavirus xa se empezan a notar nas comarcas de Ferrol, Eume e Ortegal, que presentaron uns dos peores datos de desemprego para un mes de marzo dos últimos anos. Segundo os datos do Servizo Público de Emprego Estatal, as comarcas acumularon ao peche do terceiro mes 12.615 demandantes de emprego, o que supón 509 desempregados máis que en febreiro e se traduce nun aumento do 4,2%.
Por comarcas, a de Ferrol rexistrou 439 novos parados (un 4,26% máis), o Eume subiu en 75 desempregados (un 6,48%) e o Ortegal foi a única das tres comarca que viu reducida a demanda de traballo, con 5 contratos máis que en febrerio. A variación interanual de parados no conxunto das comarcas, que mantiña unha tendencia á baixa dende o 2014, subiu este mes de marzo en 340 persoas.
Unhas cifras pouco frecuentes nun mes que habitualmente reporta uns bos datos de emprego grazas ao impulso do sector servizos. No pasado ano, por exemplo, durante o mes de marzo reduciuse o paro en 164 persoas no total das comarcas, en 2018 foron 246 máis os novos empregados en marzo e en 2017 reduciuse en 110 persoas as listas do INEM.
A alta temporalidade do sector servizos e a cancelación de varios eventos transcendentais na xeración de emprego para a comarca, como a Semana Santa, están arreciando os efectos colaterais da crise sanitaria nos concellos de Ferrolterra. Foron precisamente o comercio e a hostelería os que lideraron esta sangría de empregos na comarca. Soamente na de Ferrol perdéronse 250 postos de traballos no sector servizos, 147 deles na cidade departamental. Na industria, a comarca perdeu máis de 90 traballadores. O municipio de Ferrol pasou de 4.976 parados a 5.203.
