A veciñanza de Pontedeume e todos aqueles visitantes que pasan os primeiros días de setembro gozando da programación que ten preparada para eles ás tradicionais Festas das Peras non poderán facelo nesta ocasión. A actual crise sanitaria motivada pola Covid-19 obriga ao goberno local a deixar a un lado a masiva festividade que se leva a cabo cada ano, pero aínda así seguirá a haber troula para rato.
Actividades de pequeno formato
O Concello de Pontedeume ten previsto organizar varias actividades de pequeno formato e aforo limitado desde este domingo, 6 de setembro, con motivo das Festas das Peras 2020, como sustitución á tradicional programación cancelada pola pandemia do coronavirus.
A afluencia de xente ía en aumento ano tras ano nestas festas que contan cunha gran fama entre as comarcas lindeiras, e a casa consistorial asumen que neste momento suporían un gran risco para a cidadanía local, polo que na medida do posible vanse evitar concentracións masivas que poidan supoñer algún risco para a saúde dos asistentes.
«Por este motivo, non poderemos desfrutar de actividades tan arraigadas e tan nosas como a saída dos mómaros, a cucaña, o concurso de froitas, o combate naval, os fogos de artificio ou a xira ao río Eume, que poderían orixinar situacións non recomendables dentro da situación pandémica que estamos a padecer», explica a concelleira de Cultura e Comercio, Ángela Piñeiro.
Adaptación á nova situación
Desde o Concello de Pontedeume fan un chamamento á responsabilidade individual da veciñanza para que esta actúe durante estes días con prudencia, ademais de enviar «un afectuoso saúdo á comisión de festas así como aos sectores de hostalaría e comercio, que coa súa colaboración estaban a converter estas festas nun referente a nivel autonómico».
Para non esquecer unhas datas tan sinaladas no calendario eumés, o concello organiza unha serie de actividades de pequeno formato cumprindo con todos os plans de prevención e seguridade precisos como son visitas guiadas, ofrendas, misas, concertos ou recitais poéticos.
