A Xunta, Deputación da Coruña e o Concello das Pontes urxiron hoxe ao Goberno central á posta en marcha das medidas necesarias para que Endesa reactive a central térmica mentres se buscan biocombustibles alternativos.
Tras un encontro co grupo de traballo local por unha transición enerxética xusta para Endesa, e logo de recordar a situación límite pola que atravesan os transportistas, a enorme preocupación das empresas auxiliares e a incerteza que está a vivir a plantilla, o presidente da Xunta aseverou que ningún plantexamento pode ser distinto a manter operativa a central térmica para, dentro dunha necesaria transición enerxética ordenada, ir diminuíndo as toneladas de carbón en substitución por biocombustible.
“Estamos a falar da central térmica máis importante de España e que investiu máis de 200 millóns de euros para cumprir a normativa europea”, lembrou, incidindo en que Galicia seguirá traballando de forma coordinada, con firmeza e con diálogo por unha transición enerxética ordenada e sen rotura.
Logo de precisar que esta demanda se trasladará á mesa de traballo que terá lugar o vindeiro 10 de marzo, os representantes das administracións fixero fincapé na necesidade de aprobar mecanismos fiscais, como o céntimo verde, así como de reclamar máis fondos á Unión Europea. Non en van, España recibiu para transición enerxética 300 millóns de euros, fronte aos case 900 millóns de Alemaña e aos 2.000 millóns de Polonia.
Por outra banda, o presidente da Deputación, Valentín González Formoso, confirmou tamén a creación, en colaboración coa Xunta de Galicia, dunha Oficina de Reindustrialización para apoiar e coordinar proxectos empresariais que xurdan para garantir o futuro industrial da comarca, ademais de garantir o apoio daquelas iniciativas relacionadas coa ampliación do chan industrial no concello.
