Endesa prevé que o peche da central das Pontes, se non se atopa finalmente unha mestura de biocombustible viable na que actualmente se traballa, producirase a metade de 2021, segundo trasladou a compañía na Mesa de Transición para a planta celebrada este martes na Secretaria de Estado de Enerxía.
O grupo presentou o pasado 27 de decembro a solicitude de clausura para a central ante a ausencia de perspectivas de mellora no futuro da planta pola súa falta de competitividade debido a un incremento substancial no prezo dos dereitos de CO2 e unha caída significativa do prezo do gas.
Na solicitude de peche presentada, Endesa incluíu o dereito de desistencia se nas probas con biocombustibles atopaba unha fonte de enerxía que permitise a viabilidade técnica, ambiental e económica da planta. Desta maneira, considerando o prazo máximo legalmente establecido para a aprobación da resolución de peche, así como os prazos previstos para a recepción dos informes do operador do sistema e da Comisión Nacional dos Mercados e a Competencia ( CNMC), prevé o peche nese horizonte da metade de 2021.
O grupo puxo sobre a mesa da reunión de hoxe uns números que ofrecen un diferencial de 15 euros por megawatt hora de custo variable entre o carbón importado e o gas natural, diferenzas que ademais prevé que se incrementen no futuro.
Endesa tamén presentou na reunión o seu plan de 1.505 megawatts renovables en Galicia para substituír os 1.468 MW térmicos da central, que supoñería un investimento asociado de 1.581 millóns de euros.
A enerxética sinalou, ademais, que esta opción supoñería a posibilidade de adaptar os alternadores existentes da central térmica para conservar a capacidade síncrona e con iso facilitar a integración de máis potencia renovable.