O Concello das Pontes de García Rodríguez executará nos próximos meses un plan de mellora da seguridade viaria nos polígonos industriais dos Airíos e de Penapurreira, cun investimento total de 141.794,18 euros destinado á modernización de viais e sinalización.
As actuacións realizaranse ao abeiro das liñas de axuda da Xunta de Galicia para a mellora das infraestruturas dos parques empresariais, co obxectivo de reforzar a seguridade e a funcionalidade destas áreas de actividade económica.
Renovación do firme no polígono dos Airíos
Unha das intervencións principais centrarase na pavimentación do viario 2 do polígono dos Airíos, cun tramo de aproximadamente 830 metros e unha superficie próxima aos 8.000 metros cadrados. A vía presenta actualmente un importante deterioro debido ao tráfico pesado, con fochancas e deformacións.
O proxecto contempla a renovación da capa de rodaxe mediante aglomerado en quente, previa aplicación dun rego de imprimación, así como o fresado dos bordos para garantir unha correcta transición co pavimento existente e asegurar a durabilidade da obra.
Nova sinalización horizontal en ambos polígonos
A segunda liña de actuación centrarase na reposición completa da sinalización horizontal tanto nos Airíos como en Penapurreira. No primeiro caso, renovarase a pintura de liñas, símbolos e cebreados, moi deteriorados ou inexistentes, que afectan a máis de 9.800 metros lineais de marcas viarias, ademais de 27 símbolos e máis de 1.100 metros cadrados de zonas cebreadas.
No polígono de Penapurreira executarase tamén a renovación integral da sinalización interior, incluíndo eixes, bordos, pasos de peóns e zonas de seguridade. Antes dos traballos realizarase unha limpeza das superficies e un replanteo técnico coordinado coa Policía Local.
Con este investimento, o Concello das Pontes busca mellorar as condicións de circulación e seguridade nos dous principais polígonos industriais do municipio, facilitando o tránsito de vehículos e reforzando a ordenación destes espazos clave para a actividade económica local.