O Concello das Pontes pechará o parque da Fraga entre o 23 e o 25 de xullo. O obxectivo do peche é evitar as aglomeracións de persoas nos espazos públicos e garantir o cumprimento das normas establecidas polas autoridades sanitarias para impedir a propagación da Covid-19, xa que nesas datas se celebraría a popular romaría da Fraga.
O Concello das Pontes adopta esta medida con carácter preventivo co obxectivo prioritario de velar pola saúde da veciñanza e evitar calquera tipo de concentración nun espazo público municipal que poida provocar un rebrote na vila.
Nese sentido, o concelleiro de Seguridade Cidadá indicou que a pesar da redución drástica do número de contaxios na comarca o virus non se exterminou, e de feito recordou os máis de 100 brotes activos en España. É por iso que desde o Concello chaman á responsabilidad cidadá ademais de extremar as precaucións e contribuir ao cumprimento das normas sanitarias por parte da veciñanza.
Ademais, o Concello das Pontes porá en marcha un dispositivo especial de seguridade, que estará operativo entre o 23 e o 25 de xullo para evitar o acceso á Fraga, a instalación de cabanas e tendas de campaña así como a celebración de merendas populares.
Desde o Concello faise un chamamento a toda a poboación para que se comporte de forma responsable durante as datas nas que se ía celebrar a romaría da Fraga, cumpra cos protocolos e as medidas de seguridade para non poñer en risco a saúde de ningunha persoa.
