O Pleno do Concello das Pontes deu luz verde por unanimidade á constitución dunha servidume sobre unha parcela municipal necesaria para desenvolver as infraestruturas de captación e condución de auga da futura planta de biofibra reciclada branqueada que Biofibras de Galicia, filial de Ence, proxecta construír no municipio.
A aprobación deste trámite administrativo permitirá avanzar na execución das instalacións previstas para abastecer de auga a futura factoría, un proxecto declarado Proxecto Industrial Estratéxico (PIE) pola Xunta de Galicia en xuño de 2023.
Captación de auga desde o lago
A servidume autoriza o paso e ocupación dunha parcela de titularidade municipal para construír as infraestruturas necesarias para captar auga do lago das Pontes, bombeara e transportala mediante unha condución soterrada ata a futura planta industrial.
O permiso abrangue tamén a instalación de canalizacións eléctricas, sistemas de sinalización e telecontrol, así como dunha sala eléctrica, unha caseta de control e outros elementos auxiliares precisos para o funcionamento da infraestrutura. Do mesmo xeito, permitirá o acceso aos terreos para executar as obras e realizar labores de mantemento, inspección e reparación.
Un dereito condicionado ao uso das instalacións
A autorización terá carácter indefinido mentres as infraestruturas continúen en funcionamento e se manteñan as condicións que xustifican a súa concesión. A empresa deberá aboar a contraprestación económica correspondente, establecida conforme á normativa vixente, e asumir a reposición dos terreos ao seu estado orixinal no caso de que a servidume deixe de estar vixente.
Durante a sesión plenaria, todos os grupos municipais apoiaron a proposta, que supón un novo paso na tramitación dun proxecto industrial chamado a converterse nun dos principais investimentos previstos nas Pontes nos próximos anos.