Aproveitando a última sesión do debate de investidura producido o pasado xoves 3 de setembro, traballadores e traballadoras das auxiliares de Endesa nas Pontes realizaron unha concentración pola tarde ás portas do Parlamento galego, tendo como obxectivo principal a demanda dun proceso de transición xusto que pasa por dar garantías de emprego e dun futuro industrial.
A protesta enmárcase no calendario de mobilizacións periódicas que CIG, CCOO e UGT convocan ante a falta de avances nas solucións para os traballadores das contratas e subcontratas da central térmica que, a día de hoxe, seguen sen contar cunha solución global e completa a súa problemática.
Competencias autonómicas en materia de industria e emprego
Sobre a decisión de levar a concentración ao Pazo do Hórreo, Alberte Amado, da CIG-Industria, salientou que aínda que as competencias no proceso de transición son do Ministerio, «a Xunta de Galicia ten competencias en materia de industria e de emprego, polo que tamén ten responsabilidades cos traballadores das auxiliares e debe traballar para que se defina o número de persoas afectadas e darlle unha alternativa de garantía de emprego».
As garantías de Endesa, só até finalizar as probas
Sobre as garantías de emprego ofrecidas por Endesa para a súa industria auxiliar, lembrou que só están vixentes até que rematen as probas cos biocombustíbeis na central, que seguindo o previsto realizaranse a mediados deste mes de setembro.
