Os Concello de Cabanas e Neda anunciaron hoxe a súa participación na Andaina “Primavera no Camiño”, unha actividade que se desenvolverá simultaneamente o sábado 4 de xullo nos concellos pertencentes á Asociación de Concellos do Camiño Inglés. O obxectivo desta actividade é realizar unha peregrinación segura no Camiño Inglés dentro do territorio de cada concello. Así, en todos os concellos á mesma hora – a partir das 10.00 horas do 4 de xullo – percorrerase o treito correspondente ao Camiño Inglés.
No caso concreto de Cabanas, a andaina partirá do Polígono de Vilar do Colo, percorrendo o tramo local do Camiño Inglés polo municipio até completar a etapa no Parque do Areal, nas inmediacións da Oficina de Información Turística.
Co obxectivo de cumprir coas medidas sanitarias previstas pola crise da COVID-19, establécese un limitación de prazas a un total de 50 persoas, que deberán inscribirse previamente en [email protected] ou a través do 981 495 959 (extensión 3) indicando nome e apelidos, DNI, data de nacemento e localidade de orixe. Ademais, será necesario que todas as persoas participantes usen máscara cando non sexa posible manter a distancia de seguridade.
En Neda, cubrirase o tramo que separa o Albergue e o límite con Fene. Arrancará tamén ás 10.00 horas e está aberto a todas as persoas interesadas, pero con inscrición previa, xa que as prazas están limitadas a 50. Para anotarse é preciso chamar ao 981 38 00 39 ou acudir á casa consistorial antes do venres 3 de xullo.
O nome da Andaina Primavera no Camiño é debido á imposibilidade de realizar o evento Primavera no Camiño na data prevista inicialmente a consecuencia da COVID-19. Aínda así, dende a asociación non se quixo renunciar á promoción desta ruta xacobea e facelo deste xeito, mediante a reactivación segura do Camiño Inglés.
