O Concello de Cabanas vén de aprobar, na celebración do seu Pleno ordinario, a modificación da Ordenanza de Axuda e Emerxencia Social.
Esta decisión supón un aumento das axudas municipais destinadas a paliar as necesidades básicas e urxentes dos veciños e familias en risco de exclusión social.
Así, amplíanse as cantidades destinadas a alimentación, coidado infantil, medicinas non cubertas polo sistema de saúde, e transporte e reforzo escolar, entre outros.
Novos regulamentos
O Pleno cabanense tamén deu luz verde a tres regulamentos: o de Participación Veciñal, o de Venta Ambulante e Feiras e o do Rexistro Municipal de Entidades.
- O novo Regulamento de Participación Veciñal establece as diferentes vías de participación da veciñanza na vida municipal, fomentando a formulación de iniciativas veciñais e dándolles a posibilidade de facer preguntas nos plenos.
- O Regulamento de Venta Ambulante e Feiras nace coa vontade de garantir a boa convivencia da actividade de venda ambulante e os comercios, regulando aspectos como os horarios, zonas de realización, condicións de montaxe, ou a documentación que precisan presentar as persoas que monten os postos.
- O Regulamento do Rexistro Municipal de Entidades establece un marco xurídico que permite coñecer documentalmente a realidade do tecido asociativo e de participación colectiva.