O Concello de Pontedeume informa de que esta semana remataron as obras de mellora do alumeado do pavillón municipal ‘A Casqueira’. Os traballos consistiron na substitución das luminarias actuais por outras de tecnoloxía LED, co obxectivo de mellorar a eficiencia lumínica das instalacións, reducindo o consumo e a contaminación.
“Con este tipo de luminaria reduciremos á metade o consumo eléctrico nesa instalación á vez melloramos considerablemente a iluminación no edificio, eliminando zonas de sombra e homoxeneizando o alumeado en toda a pista”, explica o alcalde de Pontedeume, Bernardo Fernández.
O concello continúa desta forma co plan integral de renovación e modernización do alumeado público posto en marcha na pasada lexislatura, con actuacións no casco urbano, nas parroquias e nas instalacións municipais.
A día de hoxe, está en proceso de licitación o contrato para a renovación do 60% do alumeado público do municipio, por un importe de que supera os 600.000 euros, grazas a unha subvención do Ministerio para a Transición Ecolóxica.
