Esta será a décima edición deste festival de maxia que acolle cada ano o Concello de Pontedeume e que, neste, a Alameda será o lugar escollido para albergar maior parte das actuacións en horario de mañá e tarde. Porén, este ano o festival trae tamén a novidade da celebración de microespectáculos de maxia nos comercios da vila o venres 7 de agosto.
En concreto, a maxia comezará o 5 e o 6 de agosto na propia alameda, onde os horarios dos espectáculos serán ás 12:00, ás 20:00 e as 22:00 horas respectivamente. Logo roteiro máxico polos escaparates será o venres 7 ás 19:30 horas nos seguintes establecementos: As Landras, Barbarela, Confecciones Martiño, Eumephone e Joypa. Ese mesmo venres haberá antes -12:00 horas- e despois -22:00 horas- varios espectáculos que terán lugar na mencionada alameda.
“Vivimos un verán diferente, condicionados pola necesidade de preservar a seguridade e a saúde da veciñanza, pero afortunadamente puidemos atopar un formato adecuado para celebrar o festival de maxia, unha cita xa clásica cada mes de agosto; as actuacións non deixarán indiferente a ninguén”, afirma Ángela Piñeiro, concelleira de Cultura de Pontedeume.
