“A turbidez do caudal do Eume é un fenómeno natural que non entraña ningún risco sanitario e que non ten efectos adversos sobre a flora ou a fauna do río”, asegura Endesa baseándose nun estudo realizado pola Universidade da Coruña, cuxa Cátedra de Enxeñería do Terreo emitiu un informe oficial respecto diso. O ditame tamén coincide na liña adoptada pola Xunta de Galicia e o Concello de Pontedeume para mellorar a estación municipal de tratamento de auga potable.
O informe da Cátedra de Enxeñería do Terreo destaca que Endesa realiza de forma sistemática e permanente o seguimento da calidade da auga, o que facilita o estudo. Asegura tamén que “o cambio de cor e transparencia da auga do Eume obedece ao incremento do número de partículas de arxila que é transportada en suspensión”. Advirte igualmente que a arxila se presenta en partículas de moi pequeno tamaño, polo que “a súa decantación é normalmente lenta en ausencia de axentes coagulantes”.
Aclara a Universidade da Coruña que a turbidez “non propiciou ningunha deterioración en canto á calidade química ou microbiológica da auga. Por iso, salvo as adaptacións e actuacións necesarias para xestionar na ETAP (estación de tratamento de auga potable) unha carga de sedimentos superior á habitual, o aumento da turbidez non entraña (ou entrañou) un incremento do risco sanitario ou para a saúde das persoas. Tampouco se constataron efectos adversos cuantificables sobre a fauna ou a flora do río Eume ou da súa contorna”.
A Cátedra de Enxeñería do Terreo indica que a causa do fenómeno é “un episodio de choiva intensa concentrada (por encima das medias históricas) acaecido na conca do Eume o pasado agosto. Este episodio coincidiu cunha situación de nivel baixo da lámina de auga do encoro. A combinación de ambas as circunstancias conduciu a unha importante resuspensión e arrastre de sedimentos”. A maior parte destes quedou na cola do encoro, aínda que a fracción de gran máis pequeno permaneceu en suspensión foi transportada “cara á presa nun proceso lento que se verificou preferentemente por baixo da superficie”.
Según Endesa, os científicos da Universidade coruñesa conclúen o seu ditame indicando que “os sedimentos que enturban a auga descargada desde a presa non teñen a súa orixe en manobras de desaugadoiro de fondo da presa ou en verteduras accidentais. A súa fonte está augas arriba da cola do encoro, e a súa mobilización é o resultado dunha avenida excepcional”. Tamén confirman que “a orixe dos sedimentos é natural e, polas características contrastadas a través de análises, non incorporan ou liberan substancias ou compostos contaminantes susceptibles de xerar efectos adversos sobre o medio natural”.